Монгол улсын ШУА-ийн Түүх, археологийн хүрээлэн, Олон улсын Монголын судлалын холбооноос “Бурхан багшийн айлдвар: Монгол Ганжуурын судалгааны олон улсын эрдэм шинжилгээний хурал”-ыг 2017 оны 07 дугаар сарын 20-21-нд Улаанбаатар хотноо амжилттай зохион байгууллаа. Хурлыг зохион байгуулахад Монгол Улсын Үндэсний Номын Сан, Монголын бурхан шашинтны төв Гандантэгчэнлин хийд Эрдэм соёлын хүрээлэн, Г.Занабазарын нэрэмжит Дүрслэх урлагийн музей, Богд хааны Ордон музей хамтран оролцов.
Олон улсын эрдэм шинжилгээний хуралд Монгол улсын ШУА-ийн Түүх, археологийн хүрээлэн, Хэл зохиолын хүрээлэн, Гандантэгчэнлин хийдийн Эрдэм соёлын хүрээлэн, МУИС-ийн Шинжлэх ухааны сургуулийн Монгол хэл, хэл шинжлэлийн тэнхим, Фиолософи, Шашин судлалын тэнхим, Монголын Үндэсний Номын сан, “Цогт Цагийн хүрдэн соёлын төв”, Зүүн хүрээ Дашчойлин хийд, Зүүн хүрээ коллеж, ОХУ-ын ШУА-ийн Дорно дахины гар бичмэлийн хүрээлэн, Сибирийн салбарын Монгол, төвд, буддын судлалын хүрээлэн, Тувагийн Хүмүүнлэгийн судалгааны хүрээлэн, А.Н.Северцовын нэрэмжит Байгаль орчин, хувьслын хүрээлэн, Санкт-Петербургийн Улсын их сургууль, Халимагийн Улсын Их сургууль, БНХАУ-ын Өвөр Монголын Багшийн Их сургууль ӨМӨЗО-ны Номын сан, АНУ-ын Калифорнийн Их сургууль, БНКазахстан улсын Назарбаевын Их сургууль, БНУУ-ын Өтвөш Лорандын Их сургууль, БНПУ-ын Варшавын Их сургууль, БНЧУ-ын Карлын Их сургууль, ИБУИНВУ-ын Кембриджийн Их сургууль, ХБНГУ-ын Төв Номын сан, Япон улсын Токиогийн Гадаад судлалын Их сургууль, Отани Их сургууль зэрэг 11 орны эрдэм шинжилгээний хүрээлэн, Их, сургууль Номын сан зэрэг байгууллагыг төлөөлсөн 36 эрдэмтэн судлаачид олон сонирхолтой илтгэл хэлэлцүүлж өөрсдийн судалгаа шинжилгээний хамгийн сүүлийн үеийн шинэ үр дүнгээ танилцууллаа.
ШУА-ийн Түүх, археологийн хүрээлэнгээс 2015-2017 онд хэрэгжүүлж буй “Монголчуудын эртний оюуны өв Ганжуур, Данжуур судруудыг орчин цагийн монгол хэлнээ хөрвүүлэх их хөтөлбөрийн суурь судалгаа” төслийн хүрээнд хийж буй энэхүү хурал нь Бурханы шашны их хөлгөн судар Монгол бичмэл, дармал Ганжуурын түгэн дэлгэрсэн байдал, орчуулга, хөрвүүлгийн тухай шинэ мэдээ баримтуудыг эрдэм шинжилгээний эргэлтэнд оруулах, Монгол Ганжуурыг түүх, Гүн ухаан, Хэл шинжлэл, уран зохиолын үүднээс судалсан үр дүнгээр сэдвийн судалгааг баяжуулах, судалгааны цар хүрээг тэлж өргөжүүлэх, олон улсын эрдэмтдийн хүчин чармайлтыг нэгтгэн цогц судалгаа явуулахад чиглэж байгаагаараа онцлог юм.
Хурлын үеэр Монгол Улсын Үндэсний номын сангаас “Зарлиг эрдэнийн монгол соёл” үзэсгэлэн, Варшавын Их сургуулийн профессор Р.Бямбаагийн “Монголчуудын Ганжууртай холбоотой ном бүтээлийн өв” үзэсгэлэн Г.Занабазарын нэрэмжит Дүрслэх урлагийн музейд тус тус зохион байгуулагдаж, Ганжуур хөлгөн судартай холбоо бүхүй ховор содон үзмэрүүдээ дэлгэн сонирхуулжээ.